الرجاء تفعيل الـJavascript لاستخدام الموقع
اضافة صورة
إضافة رسالة صوتية
مجهول

انا في شي مسبب لي توتر و حزننن اليوم جيت واقرا و تغير صوتي وجتني الصيحه وش العلاج مع اني اخاف من النضرات

منذ 3 أيام
ipsychology
هلا حبيبتي ، يعتمد على الشي الي مسويلج التوتر والحزن ، وهل اهو الي مسبب لج الخوف من النظرات؟
0 0تعليق

السلام عليكم ، اتمنى تساعديني وتعطيني رايك تجاه مشكلتي انا كنت منعزلههه مرا و الحين صرت اطلع بس نضرات الناس تخوفني وبديت احاول اسولف وكذا و صرت اسولف بس احس شوي وببكي وانا بنص السابقه يعني حصل مرا. بكيت عند ناس بس الحين حتى مع اهلي احس اني شوي وأبكي ببعض الحالات وامس كنت أقرأ قران وصوتية تغير وشوي وابكييي والكل لاحظ واحس احيانا. بالحزن

منذ 3 أيام
ipsychology
عليكم السلام ، هذا الي يصير امر طبيعي جداً لا تخافين ، هذا صار بسبب انعزالج السابق عن الناس .. الحل اهو اولاً تغيير الافكار (من بعد التوكل على الله طبعاً) غيري افكارج عن الناس انهم مايخوفون وان الكلام معاهم ماخوف .. حتى لو حسيتي هالشي صعب ،، بعدين ابتدي بالتدريج .. بحيث اول شي كلمي الناس الي تعرفينهم بمواقع التواصل الاجتماعي فقط ، كلميهم چات يعني بس كتابة ، هالشي كبداية يعطيج فرصة تفكرين بالكلام الي بتقولينه قبل لا تكتبينه، ويعطيج فرصه تتعودين على التفاعل الاجتماعي ، و ايضا يعطيج فرصة تتعلمين طريقة الردود والكلام والسوالف الي يقولونها الناس فتقدرين تصنعين لج اسلوب عقب ماتتعلمين هالاشياء ، طبعا تستمرين على هالشي عدة اشهر الى ان تحسين نفسج جاهزة .. وخلال هالفترة مو معناته تنعزلين بالواقع وتتواصلين بالكتابه فقط ، لا عادي خلي تواصلج بالواقع خفيف ، طلعي تكلمي مع الناس بس اذا حسيتي انج خفتي خلاص انسحبي لا تغصبين نفسج .... الخطوة التالية تنتقلين لمرحلة الكلام بالتلفون .. دقي على البنات الي تكلمينهم چات كلميهم بالتلفون .. وقتها تكونين متعودة عليهم وعلى سوالفهم ومتعودة تسولفين مع الناس .. ممكن تتوترين بالبداية بس بعدين تتعودين اكثر على الكلام بالتلفون .. وبعدين انتقلي حق مرحلة الكلام والسوالف بالواقع .. دخلي نوادي رياضية مثلا .. او نوادي قراءة .. يعني دخلي مكان ما تكونين فيه انتي محط الانظار كلكم تسوون نفس الشي .. ووقتها راح تشوفين ان نظرات الناس لج مثل نظرات الناس لغيرج لان كلكم قاعدين تسوون نفس الشي .. وقتها يخف خوفج من نظراتهم ان شاءالله .. بعد هالمرحلة غصبي نفسج شوي انج تختلطين بالناس وتسولفين معاهم .. وراح تكونين تمام ان شاءالله
0 1تعليق

السلام عليكم د.ناديه الحمدان تستقبل بالدور الثاني استشارات صح كل ما اروح القى الباب مصكر غيرت المكان ولا لا ؟ ودكتور كامل الفراج وين يستقبل ماتدرين؟ ❤

منذ 3 أسابيع
ipsychology
عليكم السلام ، والله ماعندي فكره عن د ناديه ، بس د كامل يستقبل ورا كلاساته لان صعب تلقينه بالمكتب ف شوفي وين محاضراته ودشي لما يخلص
0 0تعليق

السلام عليكم ورحمة الله اود الاستشارة في امرين واحدة عني والاخرى علي عائلتي الصغرى

منذ شهر
ipsychology
عليكم السلام . تفضل/ي
0 0تعليق

مرحبا بنفع تشرحي عن تخصص علم نفس يعني عدد سنوات الدراسه واذا سهل او صعب وتكلفه وبتنصحيني بدخول على هاد مجال ؟

منذ شهر
ipsychology
اهلاً .. التخصص ٤ سنين دراسة .. طبعا يختلف من مكان لمكان ، بالنسبة لجامعة الكويت ف تدرسين علم نفس عام يعني ماتتخصصين بشي معين بعلم النفس ، في مواد صعبه وفي مواد سهله .. ويعتمد بشكل كبير نوعاً ما على الاحصاء والرياضيات عشان تطلعين نتايج البحوث ، بشكل عام التخصص وايد حلو و يعتمد على الدكاترة الي يدرسونج اذا يعطونج معلومات حلوة او لا
0 0تعليق

السلام عليكم.. مع بداية السنة الدراسية عندنا من يوم الخميس تقريبًا الاحظ ان كل سنة يزيد كسلي وخمولي بمعنى ان سابقًا في المرحلة الاعدادية كنت متفوق و جايب معدل ٩٥ و في الثانوي الفصل الاول جبت ٨٩ وبعدها ٨٨ وحاليًا ثاني ثانوي دخلت اصعب تخصص علشان اتحفز ادرس واحس قاعد اتملل و مابدرس مستقبلا للامتحانات من الكسل و سابقًا سويتها ضميري الدراسي ميت ادخل الامتحانات من دون مراجعة مااعرف اوضح المهم طبيعي هذا الشيء؟

منذ شهر
ipsychology
اول شي تحتاج تقوّي دوافعك .. اخد ورقه واكتب عليها ليش تبي تنجح وتييب معدل ؟ مثلاً عشان اهلي يفتخرون او عشان ادخل التخصص الي احبه او عشان اكوّن مستقبلي .. اكتب كل الاسباب و خلهم جدامك شوفهم كل يوم .. ثاني شي لازم تحس بالوقت والمسؤوليه .. الدراسه مسؤوليه مؤقته اذا ما شلتها الحين راح تتحسف عقب مايروح وقتها .. في دورات للتوجيه المهني او دافعيه الدراسه انصح تدخل فيها ممكن يفيدونك اكثر اخوي
0 0تعليق

تعرفين كتاب حلو استفدتي منه يخص مجال علم النفس

منذ شهر
ipsychology
اي في وايد كتب و كاتبتهم تحت بس نزلي تحت وتشوفين اساميهم 👇🏻
0 0تعليق

انا الحين طالبه بعلم النفس وحابه اقوي نفسي بهالمجال لانه انا حيل احبه ممكن تعطيني فكره عن تقوية نفسي بعلم النفس انا الحين خلصت مواد بس ما استفدت منهم بس حفظ وامتحن بعدين انسى انا ودي اقوي نفسي بس مادري شلون ياليت تعطيني فكره احس نفسي ضايعه🤔❤❤

منذ شهر
ipsychology
هلا حبيبتي .. انا كنت نفسج اول مادشيت خذيت مواد وبس حفظ ماستفدت شي .. بعدين دريت ان على حسب الدكتور في دكاتره يهتمون ان يعطونج معلومات تفيدج مثل د ناصر المنيع ، كامل الفراج ، سعود الغانم ، عبدالرحمن الفلاح ، امينة السماك .. اخذي عندهم معلوماتهم وايد قويه وراح تشوفين اشياء تفيدج حيل .. ثاني شي عندج ان تقرين كتب عشان تقوين نفسج .. في سؤال تحت حاطه فيه اسامي كتب حلوه شوفيه وان شاءالله تستفيدين منهم .. و هم في طريقة ان تاخذين دورات بس طبعا غالباً تكون غالية بس في موقع اسمه tadarab.com يحطلج الدورات بث مباشر ببلاش وقت تصويرها بس اذا طوفتي وقت التصوير تتطرين تشترينها ف حاولي تصيدين وقت البث وتستفيدين .. والله يوفقج يارب
0 1تعليق

حبيبتي ابي نصيحتج انا توني اول كورس هذا لي بالتخصص وابط كتب اتعلم فيها على التخصص واتعمق فيه بليز فيديني❤️❤️

منذ شهر
ipsychology
هلا حبيبتي ، كتب الجامعه وايد راح تفيدج بالتخصص اكيد بس اذا اخترتي الدكاتره الصح مو الي يعطون A وبس .. بالنسبة للكتب الخارجيه عندج - DSM5 - الشخصيه الكارزميه د.موسى - كتاب نظرية مزاج الشخصيات - لغات الحب الخمسة - .. هذيل حلوين كبداية .. وانصحج بالدكتور سعود الغانم و عبدالرحمن الفلاح و امينة السماك وكامل الفراج محاضراتهم وايد مفيده و معلوماتهم وايد حلوه و المحاضره چنها دورة او ندوة
0 0تعليق

نفسيا انا قلبي تمردغ بكل ما تعنيه الكلمه تعبت من الأشخاص الي في حياتي بلا استثناء صبرت من لما كان عمري 11 وللحين عمري 22 ولازلت على نفس الوضع! اخاف انه يجيني اكتئاب من التعب يعني مافي شيء بالحياة وماصابني كل شيء يخطر على البال صار لي .. بس الصبر مستحيل اقطعه لان ثقتي بالله قويه

منذ شهر
ipsychology
حبيبتي نزلي عند السؤال "الكآبه،الهموم والضغوطات النفسية شنو ممكن علاج لها" واقري الجواب 🌹🌹
0 0تعليق
عرض مزيد من الاجبات
الاعجابات
  • ابلاغ
  • الاعجابات
  • ابلاغ
  • الاعجابات
  • ابلاغ
  • الاعجابات
  • ابلاغ
  • الاعجابات
  • ابلاغ
  • الاعجابات
  • ابلاغ
  • الاعجابات
  • ابلاغ
  • الاعجابات
  • ابلاغ
  • الاعجابات
  • ابلاغ
  • الاعجابات
  • ابلاغ