ودي أعرف كيف تعاملك مع طالباتك؟ كيف تتعاملين مع طالبة تشطح بالمحاضرة او تتحرك كثير أو تسأل بشكل مزعج ، احسك حكيمة وتعرفين تضبطين القاعة

ترددت في الإجابة لأنه صعب جدا أحكم على نفسي، لكن ما أبغاك تحسين أتجاهلك. لكن فعلا غالبا ما عندي رضا عن ذاتي وأحاول أطور ذاتي... عندي عيوب كثيرة من أبرزها سرعة انفعالي. واللي أظن سببه حرصي المبالغ فيه على البنات. يعني ما أقدر أعيش وضع بكيفهم هم أدرى بمصلحتهم، ما أقدر مع إنهم جامعيات. بخصوص التعامل ممكن عندي أخطاء كثير كثير. لكن أحاول دائما إني أحافظ على مبادئ مهمة تساعدني في تقليل أخطائي أو تعديلها... هذه المبادئ هي: ١- مهما حصل من موقف حاد بيني وبين طالبة ومهما وصل درجة الصدام في المحاضرة التالية أعاملها بنسيان تام للموقف ولا كأني أتذكر أبدا أبدا... عشان لا تخاف إني أتحامل عليها واستقعد لها حتى لو كانت مخطئة ١٠٠% وحتى لو أساءت لي. ٢- لا أخجل من الاعتذار للطالبات في حال شعرت إني أخطأت بحق أحد منهم. ٣- أهتم بالتحضير كثيير كثير... يهمني جدا إن المحاضرة تكون لها فائدة معرفية فائضة على الكتاب المقرر. حتى ما يكون حضور الطالبة تأدية واجب فقط وتحسه ما يفرق عن لو جلست في بيتها وقرأت الكتاب. التحضير المكثف يشمل عدد كبير من الأمثلة في موضوع الدرس... وحكايات وتفاصيل شيقة حول المعلومات اللي يتلقونها. أهتم كثير بجذب انتباه البنات بالقصص. وبالفعل الحمد لله دايما قي التقييم يكتبون عن القصص وإنها عنصر قوة وجذب يحبونه جدا. عندي يقين تام إن الطالب لا يمكن يكون مهتم بالمقرر إلا إذا كان الأستاذ مهتم أكثر منه. اهتمامي يشعرهم بأهمية المحاضرة. ٤- أحرص يكون فيه أنشطة عملية مع إني أدرّس مادة نظرية. لكن أوزع عليهم أوراق فيها جداول يعبونها تتعلق بالقصائد التي أشرحها. أو أوراق تتضمن خانات فارغة للمقارنة بين معلومات ذكرتها. وأجمع الأوراق وأحتسبها في المشاركة. ما في شيء يضبط القاعة مثل تحويلها إلى بيئة منتجة ومشوقة. مهما كان الأستاذ شديد ومخيف ويهدد بالدرجات ويحاول يفرض هيبته. ما راح يقدر يضبط القاعة ولا يفرض ذاته إلا إن اجتهد في جعل القاعة مكان له جدوى وفاعل في التعليم. بخصوص شطحات الطالبة والأسئلة الغريبة عادي أتفاعل معها. وأحاول أقودها إلى لب الموضوع. وممكن إذا شعرت إنها تضيع وقت المحاضرة أقترح على الطالبة كتاب وأحضره لها وأقولها نتناقش عنه بعدين طالما الموضوع مهم لك. والطالبات اللي ينامون بصراحة أعذرهم وأطلب منهم يطلعون يشترون قهوة ويتمشون شوي ويرجعون لي. والله يلهمني الصواب دائما. وشكرا على حسن ظنك