مستنية اليوم ده بقالي كذا مرة علشان محتاجة رأي حد وقولت اسبقك انا علي بريد الجمعة قبل حتي ما انتي تنزلي اللينك المهم انا وهو صحاب بقالنا ٨ سنين هو اغلي واحد ف حياتي فعلا وفجأة كل اللي ف حياتي اتبخروا الا هو موجود بارضو وهو كذلك كل اللي في حياته مشيوا اللي انا معاه ومتعلقة بيه جدا مابفرحش غير معاه مابزعلش غير لما يبقي هو متضايق او في مشكلة عنده ف قولت احنا مش لسي عارفين بعض ودخلت قولتله بحبك قالي احنا اخوات وصحاب ف قولتله ده فراغ مش اكتر ومفيش حاجه من نحيتي والكلام ده ورجعنا عادي صحاب ولا كإن حصل حاجه بس أفعاله غير كلامه بطريقة غريبة وقالي لو ارتبطنا هنخسر بعض بس انا صعب قوي اقدر انه يرتبط او يخطب او انه يبعد من حياتي فاهمة! 💔💔

طول العشرة بين الأصحاب ممكن تخلق مشاعر مش حقيقية، وممكن تكون حقيقية، دا كلامي ع مشاعرك أما بالنسبة لمشاعره فهو واضح لو كان بيحبك مكانش دا بقى رده، ولا كان بعدها قال انه صعب يخطب او خايف يخسر ولا كل الكلام دا، المشكلة اننا بنبص للامور من ناحيتنا كبنات، لكن للاسف الامر عند الولاد بيكون مختلف جدًا، الولد لما بيحب بيقول انه بيحب وبعدين يبقى يفكر ف ظروفه ويعرف يخطب ولا ميعرفش اما افعاله افعال صديق حقيقي وعشرة ٨ سنين، بس انتي عشان حبتيه فبتحاولي تفسري تصرفاته ع انها حب، هو لو بيحب مكانش فيه قوة هتمنعه طول ال ٨ سنين انه يقولك حتى لو ظروفه متسمحش.. انتي اتسرعتي وانسحاب الناس من حواليكي لعب دور كبير ف انك تتوهمي ف مشاعرك وبعدين عايزة ايه من صاحب ٨ سنين غير انك ترتاحي معاه وتفرحي لفرحه وتزعلي لزعله، دا انا قلبي بيوجعني ع صديق عمري لما بيقول انه مجهد بس .. حاليًا ايه الحل ؟ ولا أي حاجة امشوا وكأن الامور لم تكن لكن ف اللحظة الل هتحسي فيها انك مش قادرة ترجعي صديقة بس ارجوكي امشي انتي ومش تجبريه يدخل قصة مش عايزها ولا حاسسها لمجرد انه ميخسركيش 💙