سؤال مجهول
السلام عليكم ورحمة الله ، ولأول مرة في حياتي كنت اسمع جملة وما اهتم او ما ماعرف شعورها ( ضايقه فيني الوسيعة ) صدق امر برحلة وكأني عايشه بضبابة سوداء افكر أنسحب وأنهي كل شي ، انا بأخر ترم ماقبل كتابة الرسالة ( ماستر ) . كُلفت لاول مره بحياتي بكتابة بحث بسيط عن موضوع ، لكن الان ارسلك ونا لي اسبوعين ولم انجز فيه الا الشيء البسيط ، بحثت وجمعت مراجع بس ما طلعت بنتيجة وقت الكتابة ما قدرت اكتب ، طلبت من شخص مساعدتي بحيث اتعلم مهارات البحث والكتابة العلمية ،ساعدني ولكن قالي جملة حسيت ان الدنيا بكبرها صفقتني قال : اذا هذا مستواك صدقيني ماراح تقدمين شيء في الرسالة. يالله ما احيلكم الشعور احس احلامي وطموحي انهدمت وقتها جلست افكر فعلاً كيف بكرة بكتب رسالتي ومستواي باللغة مو تمام !! عشان ما اطول انا ما ابغى حلول بس ابغى اعرف هل احد سبق ومر بنفس تجربتي وقدر يتخطى هذي المرحلة ولا لا 😔. اتمنى اشوف ردك للموضوع
وعليكم السلام ورحمة الله، ومن هم حتى يحددوا مستقبلنا؟ وحتى نسمع لهم ولتكسيرهم ولتحطيمهم؟ أنا ما راح أقولك كلام مثالي وتنظيري لكن والله وأحلف على غلبة الظن أن ثلاث أرباع طلبة الدراسات العليا بدأوا من الصفر في البحوث، بدأوا وهم ما يعرفوا كيف يكتبوا مقدمة بشكل صحيح، وضعك طبيعي وكثير مروا بما تمرين به الآن، لكن أرجوووك لا تجعلي كلمة أو كلمتين تهدم أحلامك ومخططاتك وآمالك، أرجوك عشان نفسك اثبتي، الإنسان ما عمره يولد متعلم، عادي هيا شوفيني أنا قالولي ما عمرك راح تتعلمي تسوقي سيارة وإنت كذا، ومع ذلك مصرة وراح أتعلم وراح أثبت لهم إنس أقدر✌️ هيا اضحكي بالله😂 وقولي ايش جاب لجاب😂 المهم المقصد في راسك حلم؟ حققيه وحاولي واتعلمي واجتهدي واثبتي للكل إنك قدها وقدود، أرجوووك للمرة الألف استمري، اكتبي اكتبي وبعدها عدلي ١٠ مرات عادي، وكل تعديل بتعلم جديد.....تحبي أعرض رسالتك في القناة تشوفي ردود أكثر؟
١ ❤︎ إعجاب