سؤال مجهول

هو جد كان بحبها..! وفي الوقت اللي فقد فيه الحب جوهره ومعناه بالصور المبتذلة اللي بنشوفها، كان هو بقاتل حتى يحافظ عليه.. وبكل مرة كانت تراوده نفسه يخطو خطوة مش مضمونة اتجاهها كان يوقفه صوت جواته.. بتعرفوا لما الحب الصادق يستمكن من قلب الشخص ويصير كل تفكيره بس كيف ما يجرح الطرف الآخر ولا يظلمه؟؟ . . وبكل مرة بكون فيها على وشك يضعف بصير يذكّر حاله ويقول: لازم أصبر وأضحّي بمشاعري الحالية في سبيل أحافظ عليها.. لازم أثبت لربنا صدقي وإخلاصي وتضحيتي إني بخافه فيها.. هو بحب يشوف صبرنا وتضحيتنا.. آه آه...بالضبط مثل ما حب يشوف تضحية سيدنا ابراهيم!!! . . ------------------ طيّب يارب.. وإنت الرحمن الرحيم كيف طلبت من إبراهيم يذبح إبنه إسماعيل؟ يعني هو إبنه وأقرب الناس لقلبه.. أكيد يا رب وإنت الغني ما رح تستفيد من دمه.. وما رح ينفعك ولا يزيد من ملكك ذبحه.. والقرآن جاوبه: فَلَمَّا أَسْلَمَا وَتَلَّهُ لِلْجَبِينِ (103) وَنَادَيْنَاهُ أَن يَا إِبْرَاهِيمُ (104) قَدْ صَدَّقْتَ الرُّؤْيَا ۚ إِنَّا كَذَٰلِكَ نَجْزِي الْمُحْسِنِينَ (105) إِنَّ هَٰذَا لَهُوَ الْبَلَاءُ الْمُبِينُ (106) وَفَدَيْنَاهُ بِذِبْحٍ عَظِيمٍ (107) آه.. أكيد ربنا ما رح يسمح بذبحه.. العبرة بالقصة "التضحية" ! مين رح يضحّي بأغلى إشي عنده.. مقابل ما يغضب ربنا وينال حبه ! . . يا الله.. معقول هي بلائي و(إسماعيلي)..!! هي الإشي اللي ربنا بدو يمتحنّي فيه ويشوف ما مدى صدقي وإيماني؟ رح أستسلم لمشاعر لحظية وأظلمها ولا رح أصبر وأجتاز بلائي؟ ولعل وعسى لو صبرت ربنا يكرمني وتكون من نصيبي.. ------------------ معقول هديك البنت لما قررت تستر مفاتنها وتلفت نظر الناس لروحها مش لجسمها، كانت بتضحّي "بإسماعيلها" ! الشب اللي استمكن منه ذنب معين وحالياً بقاتل حتى ينتصر ويتغلب عليه كان ذنبه بمثّل إسماعيله..؟! أكيد المال كان إسماعيله للشخص اللي تصدّق فيه بسخاء عالعائلات الغلبانة والمسكينة.. في بنت طلع إسماعيلها مشاعرها.. وكثير ناس كان إسماعيلها "الحسد والكبر والطمع والجشع والشهوة والسلطة" ! كل حد فينا إله (إسماعيله) إِنَّ هَٰذَا لَهُوَ الْبَلَاءُ الْمُبِينُ!! وربنا برقب مين فينا رح يضحي فيه حتى بكل خير يجازيه.. إِنَّا كَذَٰلِكَ نَجْزِي الْمُحْسِنِينَ <3 . .