سؤال مجهول

هركز على مشكلة الفترة دي بالخصوص، بس هجيبها من أولها خالص. انا كنت شاطر بغباء، وكنت مسبب لغز لزمايلي وأهلي وحتى المدرسين علشان مذاكرتي قليلة اوي. افتكر مدرس الرياضة قالي ف مرة بتذاكر كام ساعة قولتله بعمل الواجب قبل الدرس بربع ساعة وبكمله ع الرصيف قدام الأوضة وماصدقش غير لما صحابي قالوله😂. المهم علشان ما اتوهكيش ف حوارات جانبية. كنت عايز ادخل رياضة علشان بحبها بس قالولي ف البيت الاسطوانة الزفت بتاعة ملهاش شغل ومستقبل وبلابلا، وطبعا كنت غبي وساذج ومش فاهم فاستجبت ودخلت علوم وانا عارف اني همشي فيها عادي. جت الثانوية وكالعادة بأذاكر قليل بس انا عارف ان حتى لو مذاكرتش هجيب مجموع لأني ذكي "وقتها" وبعوض المجهود بالذكاء،ودي عيب مش ميزة بالمناسبة حوار الايجو ده. بعترف اني مغرور بنسبة. المهم كانت مشكلتي الأبدية ان مليش طموح زي باقي الطلاب، لما أتسئل عايز تدخل ايه اقول ال مجموعي يجيبه عادي وفاهم بغبائي ان ده رضا وتسليم لله بقى وبتاع. جت النتيجة وجبت المجموع، سألني ابويا طب طبعا، قولتله بصراحة عايز تربية. بحب العربي وعاوز اكون مدرس. طبعا المبدأ اترفض وأبويا راح بنفسه هو كتب الرغبات"بتاعتي". طب ياعم بيقولوا طب رخمة وشبين بالذات، قالي لا بيهجصوا. مش هتحامل عليه، هو كان عاوز الصالح ليا طبعا. المهم دخلت الكلية والايجو اشتغل ورفضت اي نصايح من الكبارودخلت ألوّش. الكلية كلها حفظ صرف وأنا مش كدة، انا عاوز أفهم. كلها انجلش، وانا بحب العربي اكتر. بس قوي ف الانجلش عادي مش عقبة. تخبطات دراسية ونفسية، عرفت ناس كتير واتعرفت في الكلية على نطاق واسع. اولى عدت وتانية عدت بالزق. اولى ما ذاكرتش خالص بس تانية ذاكرت بس كان في تقصير برضو. تالتة ذاكرت كويس وما سيبتش حاجة بس كنت بدخل الامتحانات وكأني معنديش فكرة عن المناهج! النتيجة طبعا كانت اني دخلت دور تاني بمواد. جبت اخري ف المذاكرة ف الدور التاني، ٤٠ يوم كنت كل يوم ما لا يقل عن عشر ساعات والله. المهم ان النتيجة كانت ايه بقى؟ في مادتين هقعد بيهم لوحدهم السنة الجاية وهتأخر سنة. رضيت بقضاء ربنا اكيد، بس لسة واقف عند درجة السلم دي وده سبب اي تعب ف الفترة دي. وبس يستي دي الحكاية وما فيها🙆‍♂️