تعبت من كتر ما بقول هعمل كذا وكذا وعايزه وهحقق وهخلص وهثبت نفسي ومعنتش هفشل تانى وبرجع اكسل العب على الموبايل اتخنق اكلم صحابي اشوف اى حاجه تضيع الوقت واعملها وازعل عليها انا مش عارفه ليه مفيش فايده فيا مع انى فعلا نفسي انجح واحقق حاجه كبيره بس ما بعملش وبتللكك لتضيع وقتى باى حاجه بجد تعبت وف نفس الوقت مش قادره اغير من نفسي فى نقطه دى

سؤال مهم : هتنجحي ف ايه ؟ وايه الحاجة الكبيرة بالظبط وبالتحديد الل عايزة تبقيها لأن للأسف رغبة الانسان بس انه ينجح ويبقى حاجة كبيرة دي مش دافع ومبتأكلش بربع جنية الانسان عشان يبذل مجهود اصلا لازم يكون قدامه هدف وواضح ومحدد الشكل والزمن والنتيجة، غير كده هو هيفضل يقول زيك كده انا عايز وعايز وهقوم اهد الدنيا وابقى سوبر مان واعمل الل متعملش... وبينزل دا كله ع مفيش لان ببساطة معندوش هدف قدامه محدد هيعمل عشانه كل دا الهدف المحدد والقريب هو الل هيخليكي تبطلي لعب ع الموبايل، وتقللي تضييع وقتك ف حاجات ملهاش لازمة فالبوينت كلها فـ هو ايه هدفك بالظبط ! ويعني ايه تبقى حاجة كبيرة ! ف ايه بالظبط وبالمناسبة الاهداف القريبة بتدفع الانسان انه يبذل محهود عشانها اكتر من الاهداف البعيدة، يعني عايزة ابقى مجدي يعقوب، اذن انت محتاج تتفوق الاول ف الكلية "دا أول هدف" اتحقق، وبعدين تتفوق ف انك تتميز وتركز ف شغلك وتحضيرك بعد كده وتكون اشطر دكتور قلب ف المستشفى الل انت شغال فيها "تاني هدف" اتحقق، وبعدين محتاج خطوة تالتة ثم رابعة ثم عاشرة ثم هوب بقيت مجدي يعقوب، تحقيقي لاهداف بسيطة بالتدريج هي الل وصلتني لهدفي الكبير "مجدي يعقوب" لكن مستحيل مثلا هبقى مجدي يعقوب مرة واحدة مش مهم تكوني حاجة كبيرة، المهم تعملي حاجة كبيرة عشان توصلي لهدفك، ومع الوقت وبالسعي تلقائيًا هتبقي حاجة كبيرة لو وقفتي اي حد ماشي ف الشارع وقولتيله عايز تبقى حاجة كبيرة، رده التلقائي : طبعا عايز حد يكره، كل العالم عايز يبقى حاجة كبيرة بس كام واحد عارف بالظبط هدفه ايه، وشغال اصلا ف الطريق الل يوصله لهدفه دا