عندي مشكله.. مخطوبه وبحب خطيبي بس هو طريقته وحشه يعني بيحب يشتمني وانا مش اشتمه يهزر وانا مهزرش يقول اي حاجه وحتي لو نفس الحاجه لا ميصحش انا اقولها بس انا عكس كده انا لو شتمني لازم اشتمه.. وهو بيزعل ويقولي اني كده بحط راسي براسه وانه كده ميصحش هو الراجل وهو كمان عصبي اووي وكل شويه يقولي امي قالتلي انك هتحطي راسك براسي عشان انا اصغر منه سنه وانا زهقت من طريقته دي ومن تعامله ده بس انا برضو بحبه بس مش قادره اسيبه وف نفس الوقت مش قادره اعدي الموضوع عادي كده عشان انا شخصيتي مش كده خالص انا بحب اخد حقي

اسمحيلي اقولك عدة ملحوظات ف الاول : اولًا الموضوع مش ند ولا حرب ولا راسي براسه لو دخلنا العلاقات بالمنطق دا فكل العلاقات هتفشل ثانيًا خطيبك - وانا بعتذر - يااما معندوش ذكاء ف التعامل يااما هو سيء بالفعل جو سي السيد دا للاسف فشل زمان وفشل فشل ذريع دلوقت مدام البيه لسانه طويل وهزاره كتير يبقى يا يقبل ان الطرف التاني يهزر زيه يا يلم هو الموضوع لو مع شريك حياتي هيتحدد عليا اهزر ازاي وامتى واقول ايه ومقولش ايه .. تفتكري امال مع مين هاخد راحتي وحريتي اني اعمل كده ! ع فكرة الشتيمة اهانة، ومع الوقت بتطور وبيبقي فيها تطاول ولو دلوقت مدارية ورا الحب والنحنحة فبعد الجواز هتبقى اهانة صريحة وتجريح مباشر الرسول لما اتكلم حتى ف نقطة معاقبة الزوجة تخيلي قال ايه : انهرها ولا تقبح "أي لا تشتم" الرسول مدرك كويس ان الشتيمة اهانة، التشيمة تجريح، ناهيكي لو الشتيمة بالام والاب فـ دي اهانة جاية ف الجول انا اعرف بنات وقفوا وقفة ف علاقاتهم مع الطرف التاني مخصوص عشان حوار طولة اللسان دا اقفي مع نفسك وفكري كويس، والل انتي قادرة تعديه دلوقت طاقتك فيه هتخلص ومش هتقدري قدام ومدام بعتيلي المسج دي اذن الموضوع مسبب أزمة وعامل مشكلة اتكلمي واتناقشي، ولو ف علاقتك مع خطيبك معندكوش مساحة للنقاش والسماع والكلام واحترام الحاجات الل بتضايق كل طرف يبقى امشي من دلوقت حتى لو بتحبيه، الحب متلقح ف محاكم الاسرة اهو بعد مااكتشفوا انه مبيبنيش البيت لوحده