بحب طريقة تفكيرك وعشان كده قررت أخد رأيك فى الموضوع ده أنا عندى صاحبة واحدة بس أيوه هى دى صاحبتى الوحيدة ومدة صداقتنا مش قليلة ابدا كانت كويسة جدا فى الأول بس هى اتحولت لشخصية بشعة عذرتها كتير اوى وجيت ع نفسى لمدة سنتين سنتين وأنا مستنياها تبقى أحسن لكن للأسف بتسوء أكتر واكتر كلامها معايا زى الأبر حرفيا بلتمسلها العذر مرات كتير بس خلاص مش قادرة كل ماقرر إنى ابعد عنها بفتكر إنها وقفت جنبى فى أكتر فترة صعبة عدت عليا بس الفترة دى فات عليها سنين كتيرة يمكن الموقف والفترة دى إللى بتخلينا اعديلها كتير بس اكتشفت متأخر بغيرتها من ناحيتى بالرغم إن حياتى مش خارقه ولا حاجة ولما بحكيلها إنى عاوزة أخد كورس أو اطور من نفسى بتكسر فى نشاطى أنا مش عارفه أتصرف ازاى انصحينى

هقولك ع حاجة.. أنا هفضل جنب صاحبي مهما حصل، مهما اتعرض لمشاكل ومواقف، هفضل جنب صاحبي ف شدته وأزمته حتى لو هتسببلي أذى أو ضرر مش مهم، لكن ف اللحظة الل هيكون صاحبي دا مصدر الضرر والأذى النفسي ليا همشي. من غير ماابص ورايا او افتكرله حاجة مدام مفيش سبب يأذيني عشانه، مدام انا مسببتلوش حاجة يأذيني عليها، وصدقيني الغيرة.. الغيرة دي ملهاش حل واسأليني أنا.. أنا فيه اصحاب حواليا بسبب نقصهم تجاهي كانوا هيدمروني حرفيًا.. دوست ع كل حاجة وتجنبتهم، تجنبتهم ف فرحتي بدل ما كانوا كل مرة يكسروهالي، تجنبت اني اخد رأيهم ف فكرة او حطوة عايزة أعملها بدل ما كانوا كل مرة يحبطوني.. امشي لو صاحبتك بقت هي بنفسها مصدر الأذى النفسي ليكي، ولو هي واقفت جنبك زمان كتير فانتي دلوقت مبتتخليش عنها، انتي بتنقذي نفسك قبل ما تكرهيها وتأذيها